2012-5-15 12:19
wilson015
墳墓上的女孩
墳場可以話係醫院以外最多鬼魂聚集o既地方，所以中國人冇乜事都唔會隨便去呢種地方。但係由於香港地少人多，好多時o的學校都逼於無奈要起o係墳場隔籬，唔單止出出入入要經過墳場，甚至上堂望出窗o個陣，就會見到一個個墳墓對到正。亦因為咁，o係墳場隔籬o既學校，就幾乎都流傳o左好多同墳場有關o既傳聞。
校長室墳場秘道
維維細個o係某區讀小學。由於學校位於墳場隔籬，所以自從二年級開始，維維就不斷聽到好多有關呢個墳場o既古怪傳聞。其中最多人講o既都係校長室裡面有一條秘道直通隔籬墳場。
維維聽人講，幾年前有幾個學生，佢o地趁畢業前一晚偷偷o地返o黎學校探險。佢o地最終o既目的地，當然係盛傳有秘道可以過隔籬墳場o既校長室。傳聞話幾個學生打開校長室度門之後，o係書檯底發現秘道o既入口。
佢o地一個一個行入去，行o左大約十分鐘之後，佢o地終於見到出口！不過佢o地發現身處o既地方已經唔o係學校範圍之內，眼前所見係一排排墓碑，當堂嚇到即刻搵路走。第二日校長返到辦公室，發覺有人入過呢條秘道，於是乎就即刻搵人封o左條路，所以而傢再冇人搵到呢條秘道。
墓碑上的女孩
維維自細已經聽慣呢類鬼故，不過由於日日都聽住，所以反而冇諗過自己會撞鬼。有一年清明節前一日，由於俾老師罰留堂，所以維維成六點幾先可以走。臨走前維維唔覺意咁望o左窗口一眼，竟然俾佢見到對面墳場o既墳墓堆度，有一個女仔坐o左o係其中一個墓碑上面！
「點解有個女仔坐o係墓碑上面o既？」維維心諗。
維維覺得呢個女仔絕對唔似鬼片裡面o個種面色蒼白、一身白衣o既鬼樣，佢仲好自然咁蹺起腳坐o係墓碑上面，身上著o既衫亦都好追得上潮流；不過佢o既表情好無奈，仲好似好悶咁。突然間，佢好似見到維維望見佢咁，仲向維維招手叫佢過去！
「佢叫我過去？唔係刦！」雖然個女仔出現o係咁奇怪o既地方，但係維維仍然覺得佢唔係太恐怖，佢甚至真係想行過去墳場o個邊搵個女仔。
「咁夜重唔返屋企？」 突然有把聲o係身後傳o黎，嚇到維維立即擰轉頭，原來係校工阿嬸見到維維成六點幾都仲留o係班房，所以叫佢快o的返屋企。維維唯有即刻行落樓梯離開學校。
不過當佢擰轉頭再望向墳場o個陣，佢見到頭先個女仔好似好唔開心咁，雖然距離咁遠，但係都好似眼有淚光咁。不過，當維維再望真o的，先發現佢流出o黎o既眼淚唔係透明，而係兩行血咁樣o既顏色！所以先會咁明顯。
由學校到屋企o既途中，維維嚇到面無人色，腦裡面係咁諗住o個個女仔見到自己要走之後好唔開心o既樣；甚至發惡夢都見到呢個女仔。所以第二朝一早六點幾，維維就換曬校服，然後跑去學校隔籬o既墳場。當佢去到噚晚o個個女仔坐住o個個墓碑o既時候，竟然發現墓碑上面張相就係噚晚見到o個個女仔。
之後，維維成日都心不在焉，無論去到邊，都覺得o個個女仔好似就o係自己o既身邊行o黎行去咁；返到屋企，維維仲時不時見到佢o係房o既窗口外面倒立o黎睇住自己；佢仲感覺到個女仔個頭可以穿過玻璃伸入o黎。
大約一個月之後維維已經成個人落曬型，終於，佢忍唔住同媽媽講。媽媽本來唔相信，但係後o黎連佢爸爸都見到呢個女仔。於是佢o地全傢第二日即刻去學校隔籬個墳場，搵返o個個女仔o既墳墓，然後o係墳墓前燒香拜祭。
「你唔好再o黎搵我喇！我已經俾你嚇死喇！你搵返同你同一個世界o既人玩啦！」維維好誠心咁對佢講。當佢講完之後再抬起頭，忽然之間，佢見到o個個女仔o係遠處同自己揮手，就好似要話別咁。